Ushtria meksikane ka kapur një avion privat, në të cilin është zbuluar një sasi prej 1.2 ton kokainë. Forcat ushtarake detyruan avionin të bënte ulje në një aeroport pranë kufirit me Belizen.
Lajmin e dha vetë presidenti i vendit, Andres Manuel Lopez Obrador, duke thënë se ishte arrestuar vetëm njëri prej dy personave në bord, ndërsa tjetri kishte arritur të largohej. Sasia e madhe e kokainës do të kapte një vlerë prej 72 milionë dollarësh në Shtetet e Bashkuara të Amerikës.
Kjo është hera e dytë brenda tri javësh që ushtria ndalon një avion të mbushur me lëndë narkotike. Më 5 tetor, një avion me kokainë me vlerë 19 milionë dollarë u përplas në Kueretaro pasi u detyrua të ulej nga ushtria. Në aksident humbën jetën dy personat që ishin brenda tij.
Në 2 shtator, një sasi rekord prej 3 mijë kilogramësh kokainë, me vlerë 142 milionë dollarë, u konfiskuan në një skaf që po lundronte pranë brigjeve të qytetit Kintana Ru.
Por droga nuk shkon vetëm me avionë drejt Shteteve të Bashkuara nga Amerika e Jugut. Autoritetet kolumbiane raportuan këtë të mërkurë se kishin ndaluar një nëndetëse “artizanale” me rreth 2 tonë kokainë në bord, që në tregun amerikan do të kapnin vlerën 60 milionë dollarë, raporton Reuters.
Brenda nëndetëses u gjetën dhe u arrestuan tre persona, një kolumbian, një ekuadorian dhe një meksikan, të cilët sapo ishin nisur për udhëtimin e tyre në Oqeanin Paqësor për të dërguar kòkainën nga Kolumbia në Meksikë, ose SHBA.
Kolumbia është një prej vendeve kryesore të prodhimit të kòkainës, që konsumohet kryesisht në Shtetet e Bashkuara të Amerikës dhe në Europë. Prodhimi i saj është burim kryesor i të ardhurave për grupet e armatosura, që furnizojnë në këtë mënyrë konfliktet e brendshme të shtetit prej pesë dekadash, me një bilanc tragjik prej më shumë se 260 mijë viktimash.
