Dy ish-anëtarët e KLP-së, Antoneta Sevdari dhe Besnik Cani, si dhe Ervin Metalla, ish-gjyqtar i Apelit të Tiranë, janë thirrur nga SPAK dhe GJKKO për të dëshmuar në lidhje me procesin gjyqësor ndaj gjyqtarit të pezulluar të Kolegjit të Posaçëm të Apelimit, Luan Daci.
Janë pikërisht këto tre ish-magjistratë, të cilët kallëzuan Dacin për falsifikim dokumentash, në fshehjen e një shkarkimi nga puna të 1997-ës si gjyqtar në Shkallën e Parë të Gjykatës së Tiranës.
Dy ish-anëtarët e KLP dhe ish-gjyqtari i Apelit Tiranë, u shkarkuan gjatë procesit të Vetting.
Gjithashtu në Gjykatën e Posaçme është thirrur për të dëshmuar si dëshmitar edhe ish-prokurori i Prokurorisë së Korçës, Elsion Sadiku.
Ndërkohë sot në GJKKO vijon procesi gjyqësor ndaj Luan Dacit, i cili është pezulluar nga funksioni si anëtar i trupës së KPA.
Prokuroria e Posaçme akuzon Dacin për falsifikim dokumentesh.
Gjyqtari i KPA akuzohet se ka fshehur vendimin e shkarkimit nga detyra për paaftësi që ish-Këshilli i Lartë i Drejtësisë i dha në vitin 1997.
Në vitin 2017, ndërsa kandidonte për anëtar të KPA, Daci u mor në pyetje në komisionin parlamentar Ad Hoc. Deputetja Vasilika Hysi i kujtoi Luan Dacit vendimin e firmosur në 1997 nga presidenti Rexhep Mejdani për largimin nga detyra.
Por në atë kohë gjyqtari deklaroi se dha dorëheqjen duke mos treguar motivin e vërtetë të largimit të tij nga detyra për paaftësi.
Këtë përgjigje gjyqtari Daci e justifikoi me pretendimin se nuk ishte i detyruar që ta bënte një deklaratë të tillë.
Dy muaj përpara se të paraqitej në komisionin parlamentar në 2017-ën, Luan Daci u refuzua nga KLD si gjyqtar i gjykatës së Tiranës pikërisht për arsyen e shkarkimit për paaftësi nga puna.
