Mbrëmjen e sotme, Inter, do të zhvillojë ndeshjen e dytë në Champions League dhe këtë herë të besuarit e Antonio Conte do të sfidojnë në transfertë Shakhtar Donetsk.
Kjo ndeshje mund të kthehet e veçantë për sulmuesin e zikaltërve, Romelu Lukaku, pasi mund të barazojë një rekord nëse shënon.
Ylli i kombëtares belge ka shënuar të paktën një gol në dhjetë ndeshjet e tij të fundit në Europë dhe nëse ai arrin ta dërgojë topin në rrjetë dhe kundër ukrainasve, atëherë barazon rekordin e Cristiano Ronaldos.
Sulmuesi i Juventus ka arritur të shënojë në 11 ndeshje radhazi në Champions League dhe Lukaku ka një mundësi shumë të mirë për ta arritur këtë rekord.
Ish-lojtari i Manchester United është në një formë të shkëlqyer këtë sezon, pasi ka arritur të shënojë pesë gola në pesë ndeshje në Serie A si dhe një dopietë kundër Borussia M’Gladbah në Champions League.
