Mbrëmjen e sotme janë zhvilluar tetë ndeshje, të vlefshme për raundin e dytë të fazës së grupeve në Ligën e Kampioneve.
Dy takime janë luajtur në orën 18:55, teksa Bayern Munich fitoi në transfertë 1-2 kundër Lok.Moscow, ndërsa Interi e mbylli në barazim pa gola kundër Shakhtar Donetsk.
Real Madrid e cila bën pjesë Grupin B, së bashku me Interin zbriti në fushën e lojës në orën 21:00. “Los Blancos” arritën të shmangin humbjen në minutat e fundit të takimit ndaj Borussia Monchegladbach duke marrë pikën e parë pas dy ndeshjeve.
Skuadra tjetër e Madridit, Atletico që është pjesë e Grupit A së bashku me Bayernin, ia doli të triumfojë me vështirësi 3-2 ndaj austriakëve të Salzburg. Pas humbjes në ndeshjen e parë 4-0 në transfertë ndaj bavarezëve “Los Colchoneros” donin me patjetër fitoren, të cilën e arritën falë një forme mjaft të mirë të Joao Felix, i cili realizoi një dygolësh.
Manchester City mori fitoren e dytë në Grupin C, pasi ia doli të triumfojë me rezultatin 0-3 në transfertën franceze ndaj Marseille.
Ndërkohë edhe anglezët e Liverpool që bëjnë pjesë në Grupin D morën 3 pikët e radhës falë një tjetër fitoreje 2-0, këtë herë ndaj danezëve të Midtjylland.
Ndonëse pritej një tjetër fitore, Atalanta vuajti jo pak përballë të rinjve të talentuar të Ajax dhe ia doli jo pa vështirësi të shmangë humbjen brenda në Bergamo. Holandezët shënuan dy herë në pjesën e parë, me Tadiç e Traore, duke vënë në vështirësi skuadrën e Gasperinit, që riktheu baraspeshën në pjesën e dytë me dy gola të Duvan Zapatës.
Rezultatet e mbrëmjes:
Ora 18:55
Lokomotiv Moscow -Bayern Munich 1 – 2
Shakhtar Donetsk-Inter 0-0
Ora 21:00
Atalanta Ajax 2 – 2
Atl. Madrid-Salzburg 3 – 2
- Monchengladbach-Real Madrid 2 – 2
FC Porto- Olympiacos Piraeus 2 – 0
Liverpool Midtjylland 2 – 0
Marseille Manchester City 0-3
