Khabib Nurmagomedov largohet si kampion. Dy raunde iu deshën për t’u konfirmuar kampion teksa mposhti Justin Gaethje. Sigurisht përdori armën e tij më të fortë, mundjen.
Pas ndeshjes Khabib zyrtarizoi pensionimin nga UFC me fjalë zemre: “Kjo ishte ndeshja ime e fundit. Nuk ka asnjë shans që të rikthehem pa babanë tim këtu. I kam dhënë fjalën nënës sime”. Përgëzimet për Khabib kanë qenë të shumta, madje edhe nga Conor McGregor.
Rivali i tij më i ashpër ka bërë një postim në llogarinë e tij në Twitter dhe shkruan:
“Paraqitje e mirë Khabib. Tani do vazhdoj unë. Respekt dhe ngushëllime edhe për babanë tuaj sërish. Respekt për ju dhe familjen tuaj. I juaj sinqerisht, Mcgregor”.
Nurmagomedov humbi të atin në verë pas komplikacioneve me Covid-19. Kjo e sotmja ishte ndeshja e parë e tij pa praninë e të atit në stafin e tij.
