Kategoria Superiore mund të rikthehet në fundjavë, por ende nuk ka një vendim zyrtar.
Liga Profesioniste e Futbollit ka dalë me një njoftim dhe bën me dije se nuk ka akoma asnjë përgjigje zyrtare nga ana e kryeministrit Edi Rama.
Në komunikatën e Ligës njoftohet se të hënën presidentët do të mblidhen sërish dhe me shumë mundësi në takim do jetë edhe kreu i FSHF-së, Armand Duka, i cili edhe do të japë detaje mbi atë që ka biseduar me Ramën.
Nje ditë më parë Duka foli për mediat dhe bëri me dije se ka marrë një premtim se Ligji i Sponsorizimit që do të kalojë do të jetë ai që komuniteti i futbollit ka propozuar, ndërsa aktuali do të bjerë poshtë.
“Futbolli duhet të luhet. Është i dëmshëm ndërprerja e tij edhe për vetë futbollistët. Duhet të luajmë një orë e më parë. Madje nuk duhet të ishte ndërprerë, por duhej arritur konsensus pa arritur në radikalizma.
Uroj të ndodhë me ndonjë ndryshim, apo me ndonjë premtim legjislativ. Në një takim të fundit të Ligës me Ministrinë e Financave është premtuar që dy propozimet do shkojnë në qeveri. Sot unë kam pasur një takim me kryeministrin dhe më ka premtuar që do të marrë në konsideratë propozimin tonë. Personalisht do doja të mos kishte pasur ndërprerja.
Tani varet nëse presidentët e Ligës do të binden. Ligji i Sponsorizimit nuk është çështje numrash. Ai është një fond për sportin, që nuk është shumë. Sporti ka nevojë për akoma më shumë. Absolutisht nuk do të isha dakord me propozimin e Ministrisë së Financave.
Nuk prodhon para. Ka prodhuar zero për 25 vite dhe tani do prodhoje zero herë tre. Nuk mund ta marrim në konsideratë. Teorikisht prodhojnë të njëjtën shifër, por aktuali nuk është funksional. Normalisht kryeministri do të flasë me Ministrinë e Financave dhe vetë mund të dalin me ndonjë qëndrim”.
