‘Na pret një dimër i vështirë’/ Rama: Respiratorët do të jenë në vijën e zjarrit për të shpëtuar jetë

Kryeministri Edi Rama ka falënderuar SHBA-në dhe NATO-n për 60 respiratorët që dhuruan për vendin tonë.

Sipas Ramës, dimri do të jetë i vështirë dhe respiratorët janë kuptimplotë në aspektin e ndihmës konkrete në fuqizimin e sistemit. “Respiratorët do të jenë në vijën e zjarrit për të shpëtuar jetë”, tha ndër të tjera ai.

“Miqtë e mirë në ditë të vështira dhe ashtu si 20 vjet më parë kur lindi kjo marrëdhënie mes Shqipërisë dhe NAOT-s në një moment tejet dramatik për botën, e cila përballej me një përshkallëzim të së keqes në trupin e saj si pasojë e terrorizmit.

Ne sot ndjehemi jashtëzakonisht mirë, jo vetëm në aspektin ushtarak, por mbi të gjitha në aspektin human, si një pjesë e këtij klubi vendesh që besojnë të vlerat e lirë, te parimet e demokracisë dhe solidariteti.

Jam shumë mirënjohës SHBA që si gjithnjë edhe në këtë rast janë treguar të vëmendshme ndaj Shqipërisë dhe dua të falënderoj në mungesë ambasadoren Yuri Kim për mbështetjen kaq të nevojshme në këtë fazë përballje me një armik kaq të pamëshirshëm që i ka rëndë ndesh jo vetëm shëndetit, por edhe mënyrës sonë të të jetuarit”, u shpreh Rama.