Vizita e Miroslav Lajçak në Kosovë dhe Serbi duket se nuk ka arritur të zhbllokojë dialogun.
Bashkimi Europian bëri me dije se ende nuk ka një datë për takimin e radhës mes palëve, ndërsa theksoi se i emëruari i posaçëm po punon në këtë drejtim.
“Sapo të kemi ndonjë datë për të shpallur për takimet e radhës, ne do ta bëjmë këtë”, theksoi zëdhënësi i BE-së, Peter Stano.
Ky i fundit nuk komentoi takimin e fundit të Këshillit të Sigurimit të Kombeve të Bashkuara për situatën në Kosovë. Aty pati përplasje të forta mes përfaqësuesve të Kosovës dhe atyre të Serbisë dhe Rusisë.
Në mbyllje të takimit, vendet europiane dolën me një deklaratë të përbashkët, me të cilën u bëjnë thirrje Prishtinës dhe Beogradit që të punojnë së bashku për të arritur konsensusin politik.
