Kryetari i PD-së Lulzim Basha, foli sot për atë që e konsideroi si vjedhja e shekullit, mbi 400 milionë euro të shqiptarëve për tre afera korruptive, që deri sot u kanë kushtuar 75 milionë euro të taksave të tyre dhe zbuloi të tjera fakte të rënda duke iu referuar vendimin më të ri të qeverisë mbi inceneratorët.
“Arsyeja pse i ka bërë bisht edhe sot pyetjeve që ka dy javë që nuk i përgjigjet, është zbuluar në vendimin e djeshëm të qeverisë për të prezantuar Buxhetin 2021.
Buxheti më i papërgjegjshëm në 30 vite, gënjeshtra më e madhe në 30 vite dhe tablo më e qartë e Edi Ramës dhe shqiptarëve përballë njeri- tjetrit.
Shqiptarët përballë njeriut që edhe në muajt e fundit të pushtetit vazhdon të vjedhë paratë e tyre për koncesione e PPP si ajo e inceneratorëve. Kam tabelën se sa para ka planifikuar Edi Rama ka planifikuar t’u japë në vitin e ardhshëm.
Vetëm inceneratorët do të marrin vitin e ardhshëm 20 milionë euro, në total afro 120 milionë euro janë planifikuar t’u paguhen këtyre kontratave dhe koncesnioneve korruptive.
Kjo shumë është gjashtë herë më e lartë se plani për indeksimin e pensioneve dhe tre herë më e lartë se shuma dedikuar për gjthë familjet në nevojë dhe ndihmë ekonomike”, tha Basha.
Sipas tij, Policia dhe Prokuroria japin informacione të hollësishme për çdo krim ordiner; për aferën e inceneratorëve asnjë informacion.
“Mos hetimi i SPAK, inkurajon hajdutët të vjedhin më shumë. Buxheti i 2021, inceneratorit të Tiranës i rritet pagesa nga 7 në 11 milion euro. Gjendja inceneratorit të Elbasanit i ngjan një burgu mafioz, ndërsa në ditët e tij të fundit planifikon të marrë 148 milionë dollarë nga xhepat e shqiptarëve”, tha Basha.
