Kreu i PD Lulzim Basha, shkruan në Twitter se çmimi i BE për gazetaren Klodiana Lala për investigimin “Përgjimet zbulojnë rolin e krimit të organizuar në blerjen e votave”, është një tjetër dëshmi se krimi elektoral i vitit 2017 ka ndodhur.
Kreu i opozitës, thotë se këtë e di gjithë bota, ndërsa drejtësia e kapur nga Rama nuk vepron mbi faktet në dosjet ‘339’ dhe ‘184’.
Lideri demokrat duke vlerësuar Klodiana Lalën, shton se drejtësia të paktën duhet të ngrihet në nivelin e investigimit të gazetares.
Basha rikthekson se ndëshkimi i krimit elektoral të vitit 2017 është një nga 15 kushtet për nisjen e bisedimeve të antarësimit midis BE dhe Shqipërisë.
Statusi i plotë
Pas tërheqjes së Edi Ramës nga padia ndaj BILD, çmimi i Bashkimit Europian për gazetaren Klodiana Lala për investigimin “Përgjimet zbulojnë rolin e krimit të organizuar në blerjen e votave”, është një tjetër dëshmi se krimi elektoral i 2017 ka ndodhur, atë e ka parë dhe e ka pranuar e gjithë bota, faktet janë aty në dosjen 339 dhe 184, por drejtësia e kapur nga Edi Rama nuk vepron.
Duke vlerësuar për investigimin gazetaren Klodiana Lala, BE qartësisht ka dhënë mesazhin që drejtësia të paktën duhet të ngrihet në nivelin e investigimit të gazetares Lala dhe të cojë përpara drejtësisë organizatorët dhe ekzekutorët e krimit elektoral të vitit 2017.
Ndëshkimi i krimit elektoral të vitit 2017 është një nga 15 kushtet për nisjen e bisedimeve të antarësimit midis BE dhe Shqipërisë.
