Shkencëtarët në Britani shprehen se vaksinat nuk kanë fuqi për të çrrënjosur virusin. Përkundrazi, Covid-19 mund të kthehet në endemi njësoj si virusi sezonal i gripit.
Sipas Patrick Vallance, virusi do të rikthehet dhe termi eliminim nuk duhet përdorur. Deri më sot e vetmja sëmundje njerëzore e cila është zhdukur tërësisht është lija e njeriut dhe kjo falë një vaksine shumë efektive.
Vaksinimi i popullsisë do të shërbejë për të ulur mundësitë e infektimit dhe ashpërsinë e sëmundjes dhe më pas ky virus do të ngjasojë çdo vit me atë të gripit.
Kompanitë e bioteknologjisë dhe organet akademike në të gjithë botën kanë bashkuar forcat në përpjekje për të krijuar një vaksinë kundër koronavirusit me shpejtësi marramendëse duke pasur parasysh egërsinë e tij. Të hënën, rastet e konfirmuara me Covid-19 arritën në 40 milionë në të gjithë botën, me 1.1 milionë raste fatale.
Vallance gjithashtu thotë se krijimi i një vaksine të sigurt dhe efikase ka kërkuar mesatarisht 10 vite kërkime. Pavarësisht se disa shtete janë në garë për krijimin e saj brenda pak kohësh, ai mendon se vaksina nuk do të jetë në dispozicion për përdorim të gjerë deri të paktën në pranverë.
Si mund të menaxhohet Covid-19 endemik?
Njësoj siç kemi mësuar të jetojmë me viruse të tjera thjesht do të duhet të mësohemi me prezencën e Covid-19 dhe ta trajtojmë si çdo sëmundje tjetër. Kjo do të thotë vaksina të përvitshme si të gripit, të cilat mund të jetë e nevojshme të azhornohen periodikisht. Dhe një mënyrë tjetër mund të jetë vaksinimi i detyrueshëm në moshën e fëmijërisë.
Zhdukja e Covid-19 është jashtëzakonisht e vështirë, madje edhe për sëmundjet për të cilat kemi vaksina pothuajse të përsosura dhe imunitet të përhershëm. Prandaj kthimi në sëmundje endemike është rezultati më i mundshëm i këtij kalvari pandemik. /CNBC
