Fatmir Kullolli, banor i fshatit Çestian, Bashkia Belsh, prej 21 shtatorit të 2019 ndodhet në një çadër, pasi banesa e tij u shkatërrua nga tërmeti që goditi vendin 13 muaj më parë.
Kulloli ka denoncuar pushtetin vendor që e ka lënë në mëshirën e fatit, ndërsa ka një fëmijë të vogël dhe bashkëshorten me një veshkë.
“Bashkia Belsh që nga tërmeti i 21 shtatorit na ka lënë në mëshirën e fatit, jetojmë në një çadër, në mes të të ftohtit dhe pa ilaçe.
Fëmijën e kam të sëmurë, po kështu edhe bashkëshorten”, shprehet në denoncimin e tij për Boldnews, Fatmir Kullolli.
Sipas denoncuesit, Bashkia i ka thënë që nuk ka fonde për t´i ndërtuar një shtëpi, ndërsa Kullolli shprehet se është gati t´i japë fund jetës pasi nuk mund të qëndrojë në një çadër që fut shiun dhe të ftohtin.
Familja e tij merr 25 mijë lekë të vjetra në muaj si ndihmë ekonomike, ndërsa mungojnë ilaçet qoftë për fëmijën dhe për bashkëshorten.
E ndërsa Kryeministri Edi Rama apo ministri i tij i Rindërtimit, Arben Ahmetaj, japin shfaqje me 3 D apo show me kantiere ndërtimi, një familje në Belsh, vuan prej më shumë se 1 viti, qëndron në çadër dhe nuk ka asnjë mbështetje. Sa familje të tilla janë lënë në mëshirën e fatit? Ndoshta me qindra, por kjo nuk pengon aspak zyrtarët e Qeverisë të vijojnë shfaqjet.
