Gjykata e Shkallës së Parë e rrethit gjyqësor të Elbasanit ka pezulluar punën mëngjesin e kësaj të hëne. Shkak janë bërë rezultatet pozitive me Covid-19 të tre punonjësve të administratës së kësaj gjykate.
Duke qenë se kontaktet e punonjësve që rezultuan pozitive me virusin kanë qenë të shumta, për shkak të detyrës, atëherë me urdhër të Institutit të Shëndetit Publik dhe në zbatim të protokolleve është vendosur pezullimi i shërbimit të kësaj gjykate, pa një afat të përcaktuar.
Në urdhrin e pezullimit specifikohet se gjykata do të ofrojë shërbime vetëm për çështje të karakterit urgjent, siç janë masat e sigurimit personal dhe urdhrat e mbrojtjes.
Ndërkohë dhjetëra qytetarë janë gjetur të papërgatitur për këtë pezullim të punës. Burime pranë administratës së gjykatës së Elbasanit janë shprehur se rifillimi i punës do të përcaktohet pas rezultateve të tamponëve të personave të kontaktit me punonjëset që rezultuan pozitive me Covid 19.
Sakaq ambientet e kësaj gjykata pritet t’i nënshtrohen edhe dezinfektimit. Prej kohësh qyteti i Elbasanit shënon çdo ditë dhjetëra raste të personave të prekur me virusin e ri.
/A2News/
