Kreu i PD-së Lulzim Basha ka reaguar pas akuzave të zv.kryeministrit Erion Braçe se ai ka blerë shtëpi në Palasë në vlerën e 500000 euro. Basha i quajti akuzat “fushatë për baltosjen e tij” dhe paralajmëroi se do të bëjë padi penale për shpifje ndaj Braçes.
“Këta s’kanë përgjigje për planin e Rimëkëmbjes të propozuar nga PD dhe për të justifikuar paratë që do shkonin për familjet që s’kanë të ardhura, shpifin.
Erion Veliajn e kam çuar për ndjekje penale për shpifje. Por meqë është dhe ky i dyti, do e çoj dhe këtë për ndjekje penale për shpifje”, tha Basha në një lidhje direkte me gazetarin Enkel Demi.
Basha tha se e deklaruar pasurinë që në vitin 2005 dhe çdo gjë është publike, ndaj ftoi kryeministrin Rama që t’i hetojë pasuritë e tij sepse policinë dhe prokurorinë e ka vetë.
“Pasuria ime është e deklaruar që në vitin 2005. E gjitha është një fushatë që ka për qëllim baltosjen time për të më penguar në mbrojtjen e interesit të qytetarëve.
Të ardhurat e mia dhe pasuria ime kanë qenë të deklaruara që në vitin 2005. Kanë polici e prokurori, aty i kanë le ti hetojnë”, tha ai.
