Kryetarja e Lëvizjes Socialiste për Integrim, Monika Kryemadhi në një deklaratë nga inceneratori i Fierit, ka thënë se ky incenerator do të jetë gropa që do të mbysë qeverinë Rama.
Kryemadhi ka theksuar se kjo çështje do të japë verdiktin dhe dënimin përfundimtar për qeverinë në zgjedhjet e 25 prillit.
“Ky incenerator nuk është gjë tjetër, por do të jetë gropa e cila mbyti qeverinë e Edi Ramës, mbyti të gjithë interesaxhinjtë rreth Edi Ramës dhe jo vetëm që do të jetë pika e shkëputjes përfundimtare të së keqes nga ky vend, por do të jetë dhe ai moment, që faktikisht do t’i japë verdiktin përfundimtar dhe dënimin përfundimtar më 25 prill Edi Ramës dhe rilindjes dhe të gjithë njerëzve, të cilët pasurohen jo vetëm duke grabitur paratë e shtetit, por pasurohen duke vrarë shpresën dhe duke shpopulluar Shqipërinë”, ka thënë Kryemadhi.
Kryetarja e LSI ka vijuar, duke thënë: “Të kthejmë tokat dhe serat në Shqipëri që të jenë të njëjtat produkte si në Europë, më të mira së në Europë, më organike se në Europë, por që t’u garantojmë pagesën si në Europë, ndoshta pse jo dhe më të mirë”.
