Dhjetë janë emrat që kanë aplikuar për një vend në Gjykatën Kushtetuese, pas sishpalljes së vendit vakant nga Presidenti Ilir Meta, me përfundimin e parakohshëm të mandatit të ish-gjyqtarit Besnik Imeraj.
Ata janë: Aleksadër Toma, Altin Binaj, Aldona Sylaj Ardita Buna (Alsula), Eugen Papandile, Ilir Haznedari, Klajdi Mone, Orkida Totojani, Përparim Kalo, Shaqir Hasanaj.
Lista e aplikantëve, së bashku me dokumentacionin e dorëzuar prej tyre, do t’i përcillet nga Presidenca, Këshillit të Emërimeve në Drejtësi me qëllim që ky organ të vijojë procesin për verifikimin e të gjitha kandidaturave për plotësimin e këtij vendi vakant.
Meta i bën apel KED që të punojë pa ndërprerje për verifikimin e kandidaturave. Të njëjtin apel i bën dhe KLGJ-së për vlerësimin e kandidaturave për plotësimin e të gjitha vendeve vakante në Gjykatën e Lartë, që jo vetëm duhet të jetë plotësisht funksionale sa më shpejt për shqyrtimin e çështjeve të mbartura, por kjo të jetë funksionale për të emëruar dhe 3 anëtarët e tjerë të Gjykatës Kushtetuese.
“Gjykata Kushtetuese duhet të jetë sa më shpejt plotësisht funksionale me të 9 anëtarët e saj, në mënyrë që gjatë shqyrtimit të çështjeve, kjo trupë gjyqësore të mos ndeshet me asnjë pengesë proceduriale që bën të pamundur marrjen e vendimeve për themelin e pretendimeve kushtetuese të ngritura nga palët”, shprehet Meta.
