Legjenda e boksit, Mike Tyson, po vazhdon përgatitjet për rikthimin e tij në ring. Ish-boksieri profesionist amerikan do të ndeshet në datën 28 nëntor kundër Roy Jones, por dalja e tij e fundit në media ka vënë në pikëpyetje gjendjen e tij shëndetësore.
54-vjeçari ishte i ftuar në emisionin “Good Morning Britain” për të promovuar pikërisht ndeshjen e tij, por Mike u shfaq i përgjumur dhe kishte probleme me artikulimin e fjalëve.
Megjithatë, ai i parapriu kritikave duke ia lënë fajin pagjumësisë për shkak të ndryshimit të orës mes Los Angeles dhe Londrës.
“U përpoqa të qëndroja zgjuar për intervistën, por më zuri gjumi. Dhe normalisht siç ndodh me një luan dhe unë e kam të vështirë të zgjohem. Po vazhdoj të stërvitem fort dhe bie në gjumë shumë herët. Nuk kisha një ekran pranë meje dhe nuk mund ta shikoja kamerën”, ka thënë 54-vjeçari.
