Dinamo dhe Vllaznia kanë matur forcat në një test miqësor të zhvilluar në kompleksin stërvitor në Pezë Helmes, teksa pas 90 minutave mjaft të luftuara, ndeshja u mbyll me rezultatin e bardhë 0-0.
Përballja mes dy skuadrave ka qenë nga më interesantet ndër vite, por i ka munguar futbollit shqiptar kohët e fundit, pasi prej 8 sezonesh blutë e kryeqytetit nuk janë më pjesë e ligës elitare të futbollit.
Megjithatë te Dinamo synojnë ngjitjen në Superligë këtë sezon dhe testi ndaj shkodranëve ishte mjaft i rëndësishëm për të parë ecurinë e ekipit të trajnerit Cammarata, ndërsa nga ana tjetër gjermani i Vllaznisë, Brdaric kërkon të mbajë të tijtë të karikuar në pritje të fillimit të kampionatit.
