Presidenti Donald Trump i është kthyer fushatës më pak se dy javë pasi ishte pozitiv për koronavirus.
Mijëra qytetarë u mblodhën në një tubim në Sanford, Florida, ku Trump bëri të parën nga katër ndalesat e planifikuara të fushatës gjatë katër ditëve të ardhshme. Presidenti dhe rivali Joe Biden po përpiqen të sigurojnë votat me tre javë deri në zgjedhjet e 3 nëntorit. Të hënën Z. Biden foli në Ohio, një tjetër shtet i lëkundur.
Sondazhet sugjerojnë se Z. Biden ka një epërsi prej 10 pikësh ndaj Z. Trump në shkallë vendi. Sidoqoftë epërsia e tij në disa shtete kryesore është më e ngushtë – siç është rasti në Florida, ku ai është 3.7 pikë përpara, sipas një mesatare të sondazheve të mbledhura nga Real Clear Politics.
Fushat e betejës si “Shteti i Diellit” janë thelbësore për mbledhjen e 270 votave të kolegjit elektoral të nevojshëm për të fituar Shtëpinë e Bardhë, e cila nuk përcaktohet nga një numërim i thjeshtë popullor i votave.
Z. Trump doli pozitiv për Covid-19 rreth 11 ditë më parë dhe u pranua në Qendrën Mjekësore Walter Reed një ditë më vonë.
Por të Dielën mjeku i tij personal tha që ai nuk ishte më një rrezik i transmetimit të Covid tek të tjerët dhe zbuloi të hënën se testet e tij më të fundit ishin negative gjatë ditëve të njëpasnjëshme, megjithëse ai nuk i dha datat.
