Kryeministri Edi Rama prezantoi këtë të Martë një paketë që sipas tij, synon ti vijë në ndihmë fermerëve. Rama tha mes të tjerash se nga 1 Janari i vitit të ardhshëm, fermerët do të furnizohen me naftë falas.
Në një reagim, Partia Demokratike shprehet se kryeministri u tall me fermerët.
Duke kujtuar se Rama refuzoi të implemetojë paketën e propozuar nga PD për rimëkëmbjen ekonomike, Dorian Teli tha nga selia blu se, “ajo çfarë bëri Kryeministri në ikje ishte një tallje me shqiptarët dhe veçanërisht me fermerët, shtresa më e goditur nga pandemia dhe më e braktisur nga keqqeverisja e tij 7 vjeçare”.
“Çfarë bëri Edi Rama për bujqësinë në 7 vjet? Vetëm 1 gjë! Rriti taksat për karburantin. A mund t’i besohet dikujt që për 7 vjet vetëm rrit taksat dhe kur do vota thotë se do ta ulë çmimin? Rritja e çmimit të naftës, duke vendosur taksën 240 lekë për litër për qarkullimi , ishte ndër aktet e para të qeverisë së Edi Ramës, prandaj sot ai është i pabesueshëm. Për taksë ‘Rama’ të qarkullimit, fermerët kanë paguar këto 7 vjet më shumë se 100 milionë euro. Edi Rama sot bëri atë që kemi paralajmëruar prej kohësh. I lodhur, i vjetër dhe pa ide të reja për zhvillimin e vendit, kopjoi edhe një tjetër një pjesë nga programi ynë për bujqësinë për uljen e çmimit të naftës”, tha Teliti.
Ai u bëri apel fermerëve të mos i besojnë Ramës.
“Mos i besoni Edi Ramës! Është mashtrimi i radhës para zgjedhjeve. Ky është personi i parë përgjegjës pse sot prodhimet kalben në fushë, pse fermerët janë të varfër, pse të rinjtë ikin nga fshati. Një kryeministër që u zhvat fermerëve 100 milionë euro vetëm nga taksa e naftës, nuk ka për të punuar asnjëherë në interes të tyre për të ulur vërtet çmimin e naftës. Deri në 25 prill, nga Edi Rama do të dëgjohen çudira, por vetëm një gjë ka rëndësi. Tani, të gjithë e dinë se deri në 25 prill vendi drejtohet nga kryeministër mashtrues”, deklaroi ai.
