Pak ditë më parë, Afërdita Dreshaj dhe bashkëshorti i saj, Jakub zbuluan se do të bëhen prindër për herë të parë, të një djali.
Së fundmi, në një bashkëbisedim me ndjekësit me anë të rubrikës “Ask me a question” në instastory, bukuroshja shqiptare ka zbuluar të gjithë detajet e kësaj eksperience.
Afërdita ka treguar se çifti e kanë pasur në plan një fëmijë, por Jakub nuk mund ta besonte në momentin që ajo i dha lajmin.
“Po, e kishim në plan dhe ndodhi menjëherë, prandaj nuk mund ta besonim dhe ishim shumë të lumtur”, ka treguar Afërdita.
E pyetur se si reagoi Jakub kur mori vesh lajmin e shtatzënisë, ajo tha: “Ai nuk mund ta besonte! Unë po bërtisja dhe i tregova atij testin, ai tha: ‘Nuk të besoj’, derisa doktori tha PO”.
Këngëtarja thotë se deri më tani ata nuk kanë asnjë ide për emrin e djalit dhe se beson kjo do të jetë zgjedhja më e vështirë.
Afërdita ka zbuluar se është në muajin e pestë të shtatzënisë dhe ndjekësit kanë mbetur të habitur nga fakti që deri më tani nuk i dallohet fare barku.
Ndërsa ka treguar se nuk e ka ndalur palestrën për shkak të shtatzënisë, sigurisht me miratimin e mjekut.
