Regjisori Kastriot Çipi ishte i ftuari i Adi Krastës në programin A-Show në SYRI TV.
Ai shpjegoi disa fërkime brenda Aleancës për Mbrojtjen e Teatrit, duke thënë se duket se palët brenda nuk kanë pasur qëllime të përbashkëta. Ai iu referua kandidaturës së Robert Budinës për partinë më të madhe të opozitës.
“Unë zotit Budina i kam kujtuar se ka qenë i pasinqertë kur ka thënë se nuk është pjesë e partive politike. Aleanca nuk ka pasur status, por ka pasur një sërë rregullash të pashkruar, ku përfshirja në parti nuk është e pranueshme,” tha ai.
Por a është aktiv Çipi me çështjen e Teatrit?
“Në janar kemi marrë leje për krijimin e fondacionit për mbrojtjen e teatrit, por nisi pandemia dhe e kishim të pamundur të nisim punën me fondacionin për qëllimin kryesor: restaurimin e teatrit siç ishte”.
“Ne zyrtarisht jemi në diktaturë. Fondacioni është ngrirë, por me rënien e qeverisë, fondacioni do fillojë punë,” tha ai.
