Agjencia Kombëtare e Shkencës në Australi ka zbuluar se Sars-CoV-2, virusi përgjegjës për Covid-19, mund të mbijetojë deri në 28 ditë në sipërfaqen e kartëmonedhave, aparatet e celularëve, apo në çelik dhe inoks. Studimi zbuloi gjithashtu se virusi mbijetoi më gjatë në temperatura të ulëta.
Në 20 gradë Celsius, virusi shfaqet “jashtëzakonisht i ashpër” në sipërfaqe të lëmuara, siç janë ekranet e celularëve dhe mund të mbijetojë për 28 ditë në kartëmonedha dhe qelq, çelik dhe plastikë.
Në 30 gradë periudha e mbijetesës bie në shtatë ditë dhe në 40 gradë bie në vetëm 24 orë.
Prania e virusit në sipërfaqe poroze si pambuku është më pak e qëndrueshme, deri në 14 ditë në temperaturat më të ulëta dhe më pak se 16 orë në më të larta, një periudhë kjo “dukshëm më e gjatë” sesa supozohet nga studimet e mëparshme, sipas të cilave virusi mund të mbijetonte deri në katër ditë në sipërfaqe jo poroze.
Trevor Drew, Drejtori i Qendrës australiane për Gatishmërinë e Sëmundjeve, specifikoi se studimi u krye me mostra të zbutura të virusit të vendosura në materiale të ndryshme dhe me një metodë “jashtëzakonisht të ndjeshme”, e cila gjeti gjurmë të virusit edhe pas një kohe të gjatë ne telefona dhe në gjendje për të infektuar.
“Kjo nuk do të thotë se ajo sasi virusi është në gjendje të infektojë njeriun. Por nëse një person prek këto materiale dhe pastaj prek gojën, sytë ose hundën mund të kontraktojë sëmundjen edhe më shumë se dy javë pas ndotjes së objekteve “.
Rezultatet e studimit me titull “Efekti i temperaturës në qëndrueshmërinë e Sars-Cov-2 në sipërfaqet e zakonshme” u botua nga “Virology Journal”.
