Me ndryshimet në Kodin Zgjedhor, që ndalohen koalicionet e përbëra parazgjedhore, opozita e bashkuar, ka nisur kalkulimet lidhur me mënyrën se si do të përfaqësohet më 25 prill.
Burime nga opozita shprehen se mundësitë janë me dy ose tre koalicione, që do të synojnë maksimalizimin e votës, ndërsa përjashtohet mundësia që çdo subjekt zgjedhor që renditet në koalicionin e drejtuar deri më tani nga Partia Demokratike të konkurojë i vetëm.
Njëri prej varianteve është që opozita e bashkuar të përfaqësohet me dy lista, njërën e drejtuar nga PD dhe tjetrën nga LSI. Por në listat e dy partive, që kanë edhe peshën më të madhe elektorale në kahun opozitar, do të përfshihen edhe kandidatë të partive të tjera, bazuar kjo në peshën elektorale sipas qarqeve.
Burimet theksojnë se nuk do të aplikohet skema e 2017, ku në listat e PD u përfshinë disa emra të propozuar nga partitë e saj aleate, por gjithçka do të bazohet mbi elektoratin e tyre.
Kështu emrat që do të propozohen do të jenë pjesë e listës shumëemërore në qarqet ku sipas të dhënave zgjedhore ose sondazheve kanë edhe peshën më të madhe elektorale.
Sipas kësaj formule, disa prej partive do të jenë pjesë e listës së PD dhe të tjera të asaj të LSI-së.
Por një tjetër formulë, e hedhur nga partitë e vogla të koalicionit opozitar, është që opozita të ketë përfaqësim me 3 koalicione, ku veç atij të PD dhe LSI, të jetë edhe një grupim partish që mund të formojnë një koalicion të tretë. Burimet shprehen se, sipas këtij propozimi, PD dhe LSI do të konkurojnë me kandidatët e tyre, ndërsa të gjitha partitë e vogla të përfshihen në një koalicion me kandidatët e tyre.
Formulat për përfaqësimin e opozitës së bashkuar në zgjedhjet e 2021 po diskutohen, ndërsa mësohet se do të kërkohet asistencë edhe nga partitë simotra europiane.
Burime nga opozita e bashkuar shprehen se më pranë aplikimit mbetet formula e përfaqësimit me dy koalicione, ku në qarqe të caktuara, lista e kandidatëve të ketë më tepër kandidatë të propozuar nga aleatët ose partitë e vogla, bazuar gjithmonë në peshën elektorale të subjektit apo emrat e kandidatëve.
Gjithsesi mësohet se diskutimet më reale do të nisin pas hyrjes në fuqi të ndryshimeve në Kodin Zgjedhor, për të cilat duhet të shprehet fillimisht Presidenti Ilir Meta. Kreu i Shtetit ka paralajmëruar se do të rikthejë për diskutimin në Kuvend ligjin e shumëdebatuar dhe të kontestuar jo vetëm nga opozita, por edhe ndërkombëtarët. Në anën tjetër, mazhoranca e drejtuar nga Edi Rama, ka deklaruar se do të rrëzojë dekretin e Metës. /BN/
