Dy persona, babë e bir mbetën të plagosur, si pasojë e një atentati me armë zjarri, ngjarje e ndodhur në lagjen Dobraç, të Shkodrës.
Të plagosurit janë Xhelal dhe Mentor Hasanaj, ky i fundit me funksionin e Shefit të Policisë Bashkiake të Malësisë së Madhe. Hasanaj nuk rezulton të ketë pasur konflikte, por mund te jetë edhe për shkak te detyrës.
Në makinë ka qenë edhe bashkëshortja e Mentor Hasanjat, 29-vjece me iniciale V.H.
Ndërkohë që autorët ishin duke udhëtuar me një motor tip “Papaq”.
Lidhur me ngjarjen, përmes një njoftimi, Policia e Shkodrës bën të ditur se “më datë 11.10.2020, rreth orës 12:30, në aksin rrugor Shkodër-Koplik, një person i paidentifikuar që qarkullonte me motomjet, ka qëlluar me armë zjarri në drejtim të mjetit të Policisë bashkiake Malësia e Madhe ku udhëtonin shtetasit M. H. 37 vjeç, V. H. 28 vjeçe dhe Xh. H. 70 vjeç, banues në Malësinë e Madhe”.
Si pasojë janë plagosur shtetasit M. H, me detyrë Shefi i Policisë bashkiake në Malësinë e Madhe dhe Xh. H., i ati i tij, të cilët janë dërguar në Spitalin Rajonal Shkodër për ndihmë mjeksore
Shërbimet e Policisë me të marrë njoftim kanë shkuar menjëherë në vendngjarje dhe kanë ngritur pika kontrolli në akset rrugore dhe po kontrollohet zona ku dyshohet se ka lëvizur autori.
Në ndihmë të Policisë Vendore kanë shkuar edhe forcat e FNSH Shkodër ku vijon kontrolli masiv i territorit për të bërë të mundur kapjen e autorit.
Grupi hetimor ndodhet në vendngjarje dhe nën drejtimin e Prokurorisë po vijon punën intensive për grumbullimin dhe fiksimin e çdo prove që do t’i shërbejë zbardhjes së ngjarjes dhe identifikimin e autorit
