Ish-kryeministri Sali Berisha ka dalë mesditën e sotme në krah të naftëtarëve të Ballshit, të cilët janë futur prej 13 ditësh në grevë urie.
Në një postim në rrjetin social “Facebook”, Berisha shkruan se naftëtarët janë viktima të sistemit të kakistokracisë dhe klientelës së kryeministrit Edi Rama.
Ish-kryeministri më tej i bën thirrje qytetarëve të mbështesin grevën, që duket se nuk do të reshtë deri në plotësimin e kërkesave që naftëtarët kanë parashtruar prej kohësh.
“Naftëtarët e Ballshit, që vazhdojnë prej shumë ditësh grevën e urisë për punën e papaguar të 20 muajve, të vjedhur nga klientela e Edvin Hajdutit, bëjnë thirrje për grevë të përgjithshme në naftë. Naftëtarët kanë të drejtë. Ata janë viktima të sistemit të kakistokracisë. Ju bëj thirrje qytetarëve të mbështesin grevën e tyre”, shprehet Sali Berisha.
