Kryeopozitari Lulzim Basha paralajmëroi kryeministrin Edi Rama të zbatojnë “planin e Rimëkëmbjes ekonomikë” të prezantuar nga Partia Demokratike në të kundërt do të ndiqet penalisht.
“Moszbatimi i planit me 5 pika që është përgjigja e duhur për të ndihmuar qytetarët, e ngarkon Ramën dhe ministrat me përgjegjësi penale. Çdo dëm i shkaktuar në jetë, ekonomi, shëndet, nesër s’do jetë vetëm problem i madh për qytetarët, përgjegjësi politike, por do ndiqet në të gjitha format dhe mënyrat si përgjegjësi penale. Ti marrësh lekët qytetarëve dhe mos t’iua kthesh kur kanë nevojë në kohën kur kanë më shumë nevojë, por t’jua vjedhësh me një grusht oligarkësh, është një krim që duhet ndëshkuar. I bëj thirrje (Ramës) ti bëj gishtin kokës” tha Basha, i cili e akuzoi kryeministrin se, “po vjedh sikur e nesërmja s’do të vijë më”.
Teksa përmendi deklaratat e Ramës se ‘mundësia e buxhetit të shtetit është e kufizuar’, Basha solli në kujtesë se vetëm këtë javë 2 milionë euro kanë shkuar për inceneratorët, që sipas kryeopozitarit, janë një aferë e madhe korruptive.
“Pagesa totale për inceneratorët është 72 mil euro – 100 mijë të papunë do kishin mundësi të merrnin 160 mijë Lekë të vjetra në muaj”, tha Basha në një konferencë për mediat nga selia blu. “Me 2 milionë euro që u janë dhënë këtë javë inceneratorëtve mund të ishin siguruar maska për ata që nuk kanë bukë të hanë dhe këtë pensionistët, që janë shtresa më e rrezikuar”, shtoi ai.
Plani me 5 pika
Plani me 5 pika i PD-së për rimëkëmbjen ekonomike parashikon:
- Çek prej 1000 euro për biznesin e vogël për 6 muajt e ardhshëm për të zbutur barrën e pagesave më urgjente;
- Vendosja e një tavani prej 2% të normës së interesit për biznesin dhe subvencionimi i çdo norme interesi mbi këtë nivel për kredimarrjet për investime dhe shpenzime operative;
- Zgjatja e afatit dhe zgjerimi i kritereve të përfitimit nga garancia sovrane në favor të një numri më të madh biznesesh prodhuese;
- Mbështetja e biznesit me një pagesë mujore prej 200 mijë lekësh për 6 muajt e ardhshëm për çdo punëtor që rimarrin në punë; Pagesa mujore prej 160 mijë lekësh për çdo shqiptar që ka humbur punën dhe shtesa mujore prej 20 mijë lekësh për çdo pensionist për 6 muajt e ardhshëm;
- Subvencionim i 50% të qirasë ose heqje e taksës së pronës për biznesin prodhues dhe punëdhënësit e mëdhenj.