Gent Cakaj, ministri i Jashtëm në detyrë, tha se Shqipëria dhe Maqedonia e Veriut “do të ndahen natyrshëm”, në procesin e hapjes së negociatave.
Teksa e vlerësoi pozitiv progres-raportin e KE-së për Shqipërinë, Cakaj tha se tanimë përparimi drejt BE-së varet nga performanca e vendeve në veçanti.
I pyetur, ’a ka rrezik për ndarje nga Maqedonia e Veriut në këtë rrugë integrimi’, gjatë një interviste televizive për A2 Neës, Cakaj tha:
“Thelbi i çështjes për mbajtjen e konferencës së parë ndërqeveritare mbetet sigurimi i funksionalitetit të Gjykatës Kushtetuese. Sa i përket një ndarjeje të mundshme nga Maqedonia e Veriut, kjo është një çështje që unë nuk mund ta them tani, për të qenë fare korrekt me të gjithë publikun, por dua të theksoi se suksesi i madh i diplomacisë shqiptare është se Shqipëria dhe Maqedonia e Veriut janë të trajtuara në mënyrë krejtësisht të njëjtë për hapjen e negociatave. Kjo nuk ka qenë e rastësishme, pasi ne kemi lobuar fort. Tashmë jemi në një situatë tjetër dhe proceset do të ndahen natyrshëm. Tashmë dy vendet i kanë hapur negociatat. Se cili vend do të përparojë më shumë në agjendën europiane, kjo varet nga performanca e tyre. Edhe Maqedonia e Veriut ka kushtet e tyre, të cilat janë të pasqyruara fare qartë në konkulzionet e Këshillit. Plotësimi i kushteve për konferencën e parë ndërqeveritare varet nga Performanca e vendeve në veçanti”.
