Bryan Borges Mascarenhas luan si mesfushor për divizionin e dytë Nautico Capibaribe FC, një ekip futbolli në Brazil. Përveç talentit në fushë, ai gjithashtu mund të shtojë lindjen e një fëmije në CV-në e tij, pasi e ndihmoi me sukses gruan për të lindur vajzën e tyre, sipas “Goalcast”.
Në mëngjes rreth orës 5:30, gruas i plasën ujërat dhe i filluan dhimbjet. Bryan u nis për ta sjellë gruan në spital, por dukej se vajza e tyre kishte plane të tjera. Çifti duhej të ndalonte menjëherë jashtë apartamentit të tyre.
Ky moment u kap nga kamerat e sigurisë në atë zonë. Pamjet tregojnë Bryan që e merr gruan në krahë, ndërsa po dilnin jashtë ndërtesës. Para se të arrinin në makinë, Myllena kishte filluar procesin e lindjes.
Bryan e shtriu për tokë Myllena-n, duke u përgatitur për ardhjen në jetë të vajzës. Sapo gruaja u shtri, filloi të ndjente se koka e foshnjës po dilte jashtë. Fatmirësisht për Bryan, lindja qe e shpejtë. Brenda pak minutash, lindi vajza e tyre.
“Vendosa dorën atje dhe Cecilia po dilte. Cecilia më pa dhe erdhi në krahët e mi të hapur!”,- tha Bryan Borges për “Daily Mail”.
“Kjo ishte padyshim, dita më e lumtur e jetës sime. Ishte një moment shumë i veçantë dhe unik,”- shtoi Bryan.
Dy miq të çiftit nxituan të ndihmonin duke sjellë një peshqir për të mbuluar të porsalindurin. Pas kësaj, Bryan dhe gruaja e tij shkuan në maternitet, ku Cecilia u peshua dhe u mat. Si foshnja, ashtu edhe Myllena janë mirë.
Ndërsa Bryan, ai nuk do ta harrojë kurrë momentin e pabesueshëm që ka jetuar.
“Ishte e bujshme, perfekte dhe e mrekullueshme. Kjo do të mbetet shenjë për pjesën tjetër të jetës sime. Një ditë do të jem në gjendje t’i tregoj asaj gjithçka për këtë”,- përfundoi Bryan Borges.
