Një i pandehur i akuzuar si bashkëpunëtor për vrasjen e një të riu në një sulm brutal pretendon se shoku i tij i banesës ishte i vetmi person përgjegjës.
Giuseppe Petriccione mohon të jetë i përfshirë në vrasjen e 21-vjeçarit shqiptar, Serxhio Markut në Brighton, Angli.
I riu shqiptar pësoi dëmtime të shumta gjatë një incidenti në banesë në orët e para të 11 shtatorit të vitit të kaluar dhe vdiq gjatë rrugës për në Spitalin e Qarkut Mbretëror Sussex.
Petriçione dhe D’Agostino akuzohen bashkërisht për vrasjen e të riut shqiptar.
Ata kishin blerë drogë prej tij një mbrëmje më parë dhe Marku ishte kthyer natën më pas për një tjetër furnizim. Por Petriçione mohon çdo përfshirje në shkaktimin e lëndimeve ndaj shqiptarit.
“Unë nuk e njihja Serxhio Markun. Po përpiqesha t’i ndaja. Ata po përlesheshin”, u tha ai oficerëve gjatë intervistës së tij me video të regjistruar nga policia.
Petriccione, nga Arienzo, afër Napolit në Itali, tha se ai pa një thikë dhe shtangë duke u përdorur si armë gjatë sherrit midis D’Agostino dhe Markut.
“Ndoshta ai [D’Agostino] e vrau atë, nuk e di. E di që tingëllon absurde, por e urrej dhunën, kam frikë prej saj. Të dy ishin të mbuluar me gjak, ata më shtynë mënjanë. Unë isha personi që u përpoqa t’i ndaj. Pashë disa veprime therëse, kisha frikë. Ata po flisnin në anglisht dhe unë nuk mund t’i kuptoja”, shtoi ai.
Policia e pyeti Petriçione pse ishte i mbuluar me gjak dhe ishte përpjekur ta lante, duke thënë: “Thjesht po më shqetësonte. Jam një person paqësor”
Më parë juria dëgjoi që D’Agostino, 45 vjeç, nga Stafford Road, fajësoi për sulmin Petriçione, duke pretenduar se shoku i tij ka një temperament të tërbuar dhe probleme zemërimi. Të dy ata e mohojnë vrasjen, ndërkohë që gjyqi vazhdon.
