Kryemministri Edi Rama ka premmtuar rritjen e pagave me 40 % për mjekët dhe mësuesit duke nisur nga 1 janari 2021. Premtimi i Ramës është pasuar me reagime të shumta, që e lidhin atë me zgjedhjet e 25 prillit.
Opozita e bashkuar përmes përfaqësuesve të saj është shprehur se prej 7 vjetësh Rama nuk ka kryer asnjë rritje pagash në administratën publike, ndërsa janë rritur taksat.
Por Kryeministri mendon ndryshe dhe ka publikuar në rrjet një tabelë sipas të cilës nga 2006 në 2021 pagat janë rritur me 56.2 %.
“Me këto dy shifra për fondin e pagave të shtetit, për thuajse të njëjtin numër punonjësish, ku mund të shihni përgjigjen e qartë të pyetjes, “A janë rritur a s’janë rritur pagat?””, shkruan Rama.
Në grafikun e publikuar nga Rama nuk ka një ndarje mes rritjes së pagave nga qeveria e tij dhe asaj e ish-Kryeministrit, Sali Berisha. Viti 2006 ishte i pari i qeverisjes Berisha, dhe nëse Rama do të bënte një krahasim real ai duhej t’i referohej vitit 2012 dhe 2020. Pra sa ishte rritja e pagave në 7 vitet e qeverisjes Berisha dhe sa janë rritur nga qeveria Rama përgjatë 7 viteve.
Duke shtrirë krahasimin në 15 vjet dhe pa një ndarje se sa janë rritur pagat në qeverisjen e tij, krahasuar me atë të mëparshmen, duket se Rama po vijon propogandën, ose ndoshta ka harruar se qeverisja e tij nis në 2013.
E ndërsa më parë për çdo gjë që nuk ecte fajin e kishte “Saliu”, duket se në fund të mandatit të dytë, Kryeministri se ka për gjë që të rrëmbejë edhe meritat e qeverisjes së mëparshme dhe t’i paraqesë si arritje të qeverisë së tij.
