Kryeministri Edi Rama ka shmangur t’i përgjigjet pyetjeve të gazetarëve lidhur me skandalin e publikuar në media, se Klodian Zoto ka përfituar miliona euro nga buxheti i shtetit për të ndërtuar inceneratorët e Tiranës dhe Fierit, por deri më tani nuk ka kryer asnjë investim.
Megjithëse Rama, gjatë konferencës për mediat, hoqi përgjegjësinë nga vetja, duke ia kaluar institucioneve, tha se ai është një investim që e kryen privati me paratë e veta, ndërsa shteti ia paguan më vonë.
“Në rastin e mbetjeve ato varen nga bashkitë. Por ne nuk i themi qytetarëve që ju do paguani më shumë.
Koncesionet tona janë në funksion të njerëzve. Pse të presim ne edhe 20 vjet për të bërë shërbimin e njerëzve për të bërë dializën?
Me transformimin kolosol që po i bëhet marrëdhënies së Shqiperise me mjedisin falë incvestimeve në Sharrë, Elbasan, Porto Romano në Durrës e Fier, bëhet një ofensiv plehu.
Plehu i vërtet është në gojët e atyre që bëjnë një ofensiv të tillë për inceneratorët. E vërteta është që u kemi shpëtuar fëmijet këtyre zonave nga sëmundjet që u kanë ndjekur nga pas si hije dhe u kemi vënë digen e mbrojtjes së mjedisit”, tha Rama.
Por ajo që është denoncuar nuk ka lidhje me atë që Kryeministri deklaron, pasi në rastin konkret nga buxheti i shtetit gjatë vitit 2018 dhe 2019 kanë kaluar miliona euro për ndërtimin e inceneratorëve të Tiranës dhe Fierit dhe këto para nuk janë investuar.
Sipas raportit të Ministrisë së Financave, gjatë vitit 2018 dhe 2019, për inceneratorët është paguar përkatësisht nga 977 milionë lekë nga buxheti i shtetit për të kryer investimin në Fier dhe Tiranës ku pjesa kryesore e investimit duhej të bëhej nga fondet e kompanisë, parashikuar kjo në kontratë.
Vlera faktike e investimit kapital për vitin 2018 ka qene vetëm 20 për qind e vlerës së planifikuar në planin e biznesit. Ndërsa vlera e investimit kapital për vitin 2019 ka shënuar 526,2 milionë lekë ose vetëm 10 për qind e planit në kontratë.
Sipas kontratës kompania Integrated Energy duhet të investonte në vitin 2019 rreth 5,9 miliardë lekë, nga të cilat më shumë se 5 miliardë lekë duhet të ishin nga fondet e kompanisë dhe afërsisht 1 miliardë lekë pagesa nga buxheti. Por kompania nuk ka arritur të azhurnojë në investime as pagesën e marrë nga buxheti i shtetit.
Për periudhën 2018-2019, sipas kontratës duhet të ishin investuar 11,4 miliardë lekë, por janë investuar vetëm 1,6 miliardë lekë ose rreth 12 përqind e planit. Klodian Zoto ka përfituar 47 milionë euro nga buxheti i shtetit deri më tani, sipas shifrave zyrtare të Ministrisë së Financave.
Kontrolli i Lartë i Shtetit ka gjetur parregullsi të mëdha lidhur me pagesat e thesarit për kompaninë e Klodian Zotos, e cila deri më tani ka marrë koncesionin e ndërtimit të tre inceneratorëve në vend.
