Kryetari i PD-së, Lulzim Basha, i ka bërë thirrje organeve të reja të drejtësisë që të hetojnë atë që ka ndodhur në rafinerinë e Ballshit.
“Nuk ka nevojë të vijnë këtu dhe të shpojnë ndonjë pus për të gjetur se ku kanë shkuar paratë. Paratë e vjedhura këtu i keni në mes të Tiranës, atje ku ndërtohen kullat, atje ku hapen kazinotë, ose në banka.
Këtë duhet të bëjnë këto organet e reja të drejtësisë që po përkëdhelen si institucione të reja, por prokuroria duhet të hetojë”, tha Basha, gjatë bashkëbisedimit me naftëtarët në Ballsh.
Ai kërkoi prej grevistëve të urisë që të bëhemi bashkë, pasi qeveritarët dhe ata që grabisin këtë vend janë bërë bashkë dhe merren vesh shumë mirë gjatë takimeve në skuta.
“Sot kam vetëm fjalën, pasi jam kryetar i opozitës, por këto që po ju them sot, do i realizojmë me qeverinë e re të pas 25 prillit. Shteti do të njohë borxhin prej 8 mln eurosh, që do ua nxjerrim nga hundët atyre që ua kanë vjedhur juve”, tha Basha.
