Familjarët denoncojnë në polici zhdukjen e tre të rinjve.
Mësohet se denoncimi në policinë e Malësisë së Madhe është bërë dje pasi rezulton se tre personat kanë humbur kontaktet me familjarët prej të shtunës, 3 tetor 2020.
Personat e zhdukur janë:
- Vilson Çutaj, i datëlindjes 20.11.1983, banues në fshatin Bajzë, bashkia Malësi e Madhe
- Klement Pepaj, i datëlindjes 15.01.1999
- Danjel Pepaj, i datëlindjes 17.09.1995
Dy të fundit, me banim në fshatin Vrith, Malësi e Madhe, janë kushërinj me njeri-tjetrin.
“Rreth orës 17:30, në Komisariatin e Policisë Malësi e Madhe, ka bërë kallzim shtetasi O.Çutaj, banues në fshatin Bajzë, Malësi e Madhe, se me datë 03.10.2020, rreth orës 15:00, ka humbur kontaktet me vëllain e tij shtetasin Vilson Çutaj, 37 vjeç, banues në fshatin Bajzë, Malësi e Madhe, dhe me dy afërmit e tij (kushërinjë) shtetasit Klement Pepaj, 21 vjeç, dhe Danjel Pepaj 25 vjeç, të dy me banim në fshatin Vrith, Malësi e Madhe. Shërbimet e Policisë pas kallzimit të bërë nga shtetasi O.Ç, kanë nisur kontrollet për gjetjen e këtyre shtetasve”, njoftoi policia.
Prindërit e njërit prej djemve të raportuar të humbur, Klement Pepajt, thonë se ai nuk ka pasur konflikte me njeri, në dijeninë e tyre.
“Ne nuk dimë asgjë për ta. Policia ka bashkëpunuar me ne, kanë kërkuar por nuk kanë gjetur. Unë djalin tim e kam lënë në shtëpi, Klement Pepaj. Kur erdha në shtëpi pyeta bashkëshorten se ku është djali, dhe më tha që ka dalë për një kafe me Vilsonin. Me djalin kam biseduar vazhdimisht por ai nuk më ka thënë kurrë nëse ka problem me ndonjë person”, tha babai i 21-vjeçarit, Nush Pepaj, në një prononcim për gazetarët.
“Unë isha në shtëpi me djalin. Doli me xhup për të pirë një kafe por që prej asaj dite nuk e pashë më. Nuk dimë asgjë. Veç kur na erdhi policia në 3 të natës dhe na tha ku është Klementi”, tha e ëma, Gjelina Pepaj.
