Oerd Bylykbashi, ish-deputet i PD dhe anëtar i Këshillit Politik, ka zbuluar përmes një postimi në rrjetet sociale atë që e quan si mashtrimin e PS-së se listat e hapura nuk lejojnë koalicionet parazgjedhore.
Bylykbashi përmend sistemin zgjedhor italian, ku aplikohen listat e hapura dhe koalicionet e përbëra. Ish-deputeti shprehet se Edi Rama nuk shpëton nga humbja, pavarësisht sistemit që do të aplikohet.
“Broçkullat që sistemi italian nuk është i njëjtë me atë shqiptar i thua vetëm kur je në hall. Tani u mbetet vetëm të thonë që italianet nuk janë njësoj me shqiptarët. Kur je ne hall thua edhe të fundit, pa t’u skuqur fytyra.
Kur kërkuan një vend europian ku përdoret koalicioni me listë të përbërë siç e ka Shqipëria, ia treguam.
Është Italia, vendi që e përdor aktualisht për zgjedhje për Parlamentin kombëtar, për Parlamentet rajonale si Lombardia, Lazio, Puglia, Sicilia etj ku votojnë më shumë zgjedhes seç ka banorë Shqipëria, por e përdor edhe për këshillat bashkiake të Romës, Milanos, Bolonjës, Firences, etj ku votojnë më shumë zgjedhës seç votojnë në Shqipëri. Italia është vendi i madh europian nga ku e kemi marrë këtë model të mirënjohur, me konsensus PS-PD që në vitin 2003.
Kur gënjyen se koalicioni me listë të përbërë nuk përdoret dot me listat e hapura, ia provuam publikisht që gënjejnë.
Thanë që me koalicionin siç e kemi ne, me listë të përbërë, fleta e votimit bëhet shumë e komplikuar. Por ja që Italia e ka zgjidhur. Zgjidhjen me një fletë të thjeshtë votimi e kemi demonstruar edhe ne prej disa muajsh.
Sisteme demokratike në Europe ka plot, por nuk ka sistem që ta shpëtojë Ramën nga humbja e thellë që e pret”, shkruan Bylykbashi.
