Për nënkryetarin e LSI-së, përfaqësues i opozitës në Këshillin Politik Petrit Vasili, votimi i paralajmëruar nesër i kodit të ri zgjedhor nga Rama është prova e fundit të tij dhe varros integrimin e vendit.
Në një konferencë me mediat, Vasili tha sot se Rama është armiku i integrimit të vendit dhe me votimin e nesërm nuk ka hapje negociatash.
“Votimi i nesërm për të gjithë opinionin publik është prova e fundit të paralajmëruar të Edi Ramës. Çdo akt i nesërm nuk është as më shumë e as më pak, përgjegjësi shumë e rëndë, pasi në mënyrë të vullnetshme, në funksion të një strategjie të mirëpërcaktuar varros integrimin europian të vendit. Me votimin e nesërm hapje negociatash nuk ka. Armiku i integrimit që mbajti 3 vjet pezull integrimin për një kryetar qarku në Fier, shfaqet sërish sot me një strategji të re por me një qëllim të vjetër, pengimin me çdo kusht të integrimit europian të vendit. Sot ky integrim ka vetëm një armik, një instrument politik që është Rilindja dhe person konstant në vite që shfaqet në momentin kur ky proces duhet të shkojë përpara për ta penguar. Axhenda e tij anti NATO, anti perëndim dhe është e drejtuar në një drejtim negativ, të panjohur, drejt realiteteve të ngarkuara me pisllëk politik. Është e qartë për shqiptarët se cila është fytyra e atij që pengon dhe izolon vendin dhe fytyra e qartë e një njeriu që duke humbur dhe duke e pasur të qartë humbjen, kalon nga njeriu që pengon hapjen e listave, që bën sikur i hap listat. Në njeriun që thotë se koalicione parazgjedhore do ketë por si dua unë, në njeriun që e tmerroi 5 qershorin se i këputi duart nga futja e duarve në zgjedhjeve përpiqet të bëjë sërish aktin e fundit të tragjedisë së vetes. Shqiptarët e kanë të qartë.
Ky qëndrim është qëndrimi politik yni në raport me këtë akt të një mafiozi politik që i duket sikur do shpëtojë”, deklaroi Vasili.
