Kryeministri Edi Rama i ka kërkuar presidentit serb Alkesandër Vuçiç të dënojë deklaratën e Ministrit të Mbrojtjes, se “Rama duke i premtuar portin e Durrësit Kosovës është duke vazhduar punën e tij për krijimin e Shqipërisë së Madhe”.
Në një postim në Twitter, Rama i ka bërë “tag” Vuçiçit dhe ka shkruar: “Unë shpresoj të jetë një shaka e mendjeve të thara dhe e gojëve të liga që mbajtën rajonin tonë në errësirë prej shekujsh? Unë uroj shumë të jetë një shaka, përndryshe kjo do të jetë një shfaqje e keqe e të menduarit të mjerë, të cilën ju duhet ta dënoni pa asnjë mëdyshje”.
Ministri serb i mbrojtjes deklaroi dje se “Rama duke i premtuar portin e Durrësit Kosovës është duke vazhduar punën e tij për krijimin e Shqipërisë së Madhe”.
“Shqipëria e madhe është një shpallje e një fatkeqësie të madhe që do të prishë dhe shkatërrojë shtete dhe kombe në Ballkan. Vetëm serbët e bashkuar mund ta ndalojnë Shqipërinë e madhe, dhe sa më parë ne të bashkohemi institucionalisht, aq më shpejt në Ballkan do të fillojë koha e paqes”, citohet ai në një deklaratë zyrtare.
Rama tha gjatë mbledhjes së përbashkët të qeverive Kosovë-Shqipëri, se porti i Durrësit do të jetë “de facto” dhe i Kosovës.
