Vetingu në polici po ndërmerret nga injorantët, apo më keq akoma, po influencohet nga bandat? Pyetjen e shtron gazetari Ferdinand Dervishi, pas vendimit të Komisionit të Jashtëm të Vlerësimit që shkarkoi nga detyra Arben Frashërin. Sipas tij, ashtu si vetingu në radhët e prokurorëve dhe gjyqtarëve, dhe vetingu në polici ka dështuar.
Arben Frashëri, Drejtor i Drejtorisë Rajonale Fier – Berat në SHÇBA u shkarkua nga detyra këtë të Premte nga Komisioni i Jashtëm i Vlerësimit (KJV). Vendimi erdhi pasi KJV konstatoi probleme në justifikimin e pasurisë së Frashërit.
Në një reagim, gazetari sqaron se Arben Frashëri nuk ka justifikuar 20 milionë lekë të vjetër të blerjes së një shtëpie 1+1, që ka në Tiranë, si të vetmen pasuri të tij (27 milion të vjetra me gjithë mobilimin). Saktësisht, Arbeni nuk ka mundur të vërtetojë të ardhurat si emigrant në Greqi, ku ka punuar, bashkë me gruan, për një periudhë 3-vjeçare para vitit 1997, shprehet gazetari.
“Në këtë moment pyetja ulëritëse që më godet në kokë është: More, po këta njerëz që kanë punuar gjithë jetën për shtetin a duhet të kenë një shtëpi, apo duhet të jetojnë me qira? Ndërsa ai që më shokon krejtësisht është fakti se në gjithë ata që vazhdojnë të japin kontributet e tyre në Policinë Shqiptare, unë nuk njoh një të dytë si Arben Frashëri. Ai ka merita si askush tjetër në vendosjen e rendit në Berat gjatë pjesës së dytë të vitit 1997 dhe më tej, si pjesë e Krimeve të Rënda, është mbase polici që ka hetuar e rrasur në burg më shumë se kushdo tjetër banda e elementë kriminalë, qofshin të fortë sa grupi i Alferd Shkurtit në Lushnjë, apo ai i Lulzim Berishës në Durrës e kështu pa fund. Me pak fjalë Arbeni është nga të rrallët shqiptarë që gjithë jetën ka punuan për shtetin dhe jo per xhepat. Për mua, nëse ka një polic hero në Shqipëri, është vetëm Arben Frashëri. Këtë e kam pohuar dhe do vazhdoj”, shkruan gazetari Dervishi në një postim në FB.
“Po tani? A kam të drejtë të mendoj se vetingu në polici po ndërmerret nga injorantët, apo më keq akoma, po influencohet nga bandat???? Në fakt shembullin e një tjetër vetingu të dështuar e kemi”, e mbyll ai reagimin.
https://www.facebook.com/photo.php?fbid=10221748203508528&id=1059194438&set=a.1083228035129&source=57
