Ekspertja e Instituti të Shëndetit Publik, Eugena Tomini ndërsa foli për ecurinë shkollave në kohën e pandemisë, u shpreh se ka pasur sensibilizim për respektimin e masave.
E ftuar në rubrikën “Opinion”, në “News24”, ajo u shpreh se ka pasur edhe raste infektimesh, por që janë izoluar si dhe janë evidentuar kontaktet e ngushta.
Sipas saj, ekzistojnë disa skenarë në rast se do të kemi një shpërthim të koronavirusit, ndërsa mbylljen e shkollave e konsidero “skenarin më të errët”. Megjithatë, sipas Tominit është ende herët për të thënë nëse do të shkojmë drejt këtij skenari.
“Ka pasur sensibilizim nga të gjitha strukturat arsimore, por edhe nga prindërit, për të zbatuar me përpikëri masat. Kemi evidentuar kontakte të ngushta dhe i kemi izoluar. Nga ana tjetër kemi izoluar një klasë të tjetër, por nuk kemi evidentuar raste pozitive të kontaktit të të infektuarit.
Ekzistojnë disa skenarë, nëse do të ketë shpërthim të virusit, por është ende herët. Jemi duke monitoruar në mënyrë intensive për të evidentuar në kohë çdo rast. Jemi akoma herët për të thënë nëse do të shkojmë drejt një skenari të errët, për mbylljen e shkollave”, tha Tomini.
