Një përfaqësi e mjekëve ka zhvilluar këtë të mërkurë një takim me ministren e Shëndëtësisë dhe Mbrojtjes Sociale Ogerta Manstirliu, ku është diskutuar për të ngritur një grup pune ku do të diskutohen kërkesat e mjekëve dhe mundësitë e ofruara nga shteti për ti ndihmuar.
Në përfundim të këtij takim, një prej mjekëve pjesëmarrës në takim, Gent Stroni është shprehur se janë caktuar dy juristë nga Ministria dhe nga ana e tyre për të vendosur modalitetet e marrëveshjes për kërkesat e bëra nga bluzat e bardha.
I pyetur nëse janë dakord që paga e tyre të rritej në masën 40%, mjeku tha se në Shqipëri mjekët kanë pagën më të ulët në rajon.
“Ne nuk jemi tek 40%, ne kemi argumentime të tjera. Si për shembull, ne jemi vendi me pagesën më të ulët në të gjithë rajonin. Do ta shikojmë gradualisht.
Ne do sjellim argumentet tona në grupin e punës, por çdo gjë do të duhet të jetë në bazë të argumenteve. Kemi një kosto të lartë jetese. Drafti jonë do të ballafaqohet me draftin e tyre. Në momentin që juristët e Ministrisë dhe tanët të jenë gati.
Drafti është marrëveshje bashkëpunimi. Ne pretendojmë të marrim sa më shumë por kjo varet nga mundësitë. Duam të argumentojmë që rritja të mos jetë 40 por 41%”- është shprehur Stroni
Prej disa ditësh Kryeministri Edi Rama po trumpeton rritjen e pagës së mjekëve dhe infermierëve në masën 40 %, madje sipas Arben Ahmetajt, ato mund të shkojnë edhe në nivelet nga 700 në 1200 euro.
E ndërsa ky vendim nuk dihet se kur mund të merret, procesi ka hyrë në fazat burokratike, atë të ngritjes së grupeve të punës, që do të diskutojnë problematikat.
