Avokati Ledio Braho, një prej kandidatëve për organet e reja të Komisionit Qendror të Zgjedhjeve, u shpreh se është kandidati i duhur për KAS, pasi është një risi ligjore si institucion.
Me eksperiencën e duhur dhe pa pasur “mëkate” në kurriz, edhe për shkak të moshës, avokati Ledio Braho, është një nga kandidatët potencial për KAS, ku avantazhet e tij janë integriteti dhe kurajo, sikundër edhe fakti se e ka pothuajse të pamundur të bëjë kompromis me anti-ligjin, anti-kushtetueshmërinë dhe padrejtësinë. Këtë e konfirmon edhe qëndrimi i tij ndaj shumë prej çështjeve sensitive, debateve publike dhe politike, në fushën e të drejtave, legjislacionit dhe Kushtetutës.
“Anëtarët e këtyre Komisioneve duhet të kenë një integritet të lartë dhe të jenë të depolitizuar. Mendoj se i plotësoj kushtet dhe kriteret, sikundër kam bindjen se do të përmbush detyrat ligjore”, tha Braho para Komisionit të Posaçëm Parlamentar.
Ai theksoi se zgjedhjet në Shqipëri janë kontestuar prej 30 vjetësh, ndaj dhe organet e reja që do të administrojnë procesin është e rëndësishme që të kenë anëtar me integritet.
Braho paraqiti para komisionit të gjithë karrierën e tij, eksperiencën në institucionet e vendit, përfshi edhe pozicionin si këshilltar në Presidencë, si dhe kontributin që ka dhënë në reformën rregullatore.
Aktualisht Braho ushtron profesionin e avokatit duke pasur studion e tij ligjore.
Braho është një nga zërat më kritikë ndaj nismave anti-ligjore dhe anti-Kushtetuese të ndërmarra nga Qeveria, duke dëshmuar në këtë mënyrë jo vetëm kurajo dhe integritet, por edhe duke vënë në plan të parë interesin publik. Vetëm në muajt e fundit, avokati Braho, që sot kandidon për KAS, ka denoncuar publikisht rastet kur deklaratat në rrjetet sociale nga Kryeministri ktheheshin në vendime apo ligje, pa u miratuar nga Qeveria apo Kuvendi, dhe ishin ndëshkuese për qytetarët. Mjafton këtu të kujtojmë gjobat pa fund që aplikoheshin nga Policia e Shtetit ndaj qytetarëve që dilnin nga shtëpia gjatë kohës së izolimit. Gjithashtu Braho ka kundërshtuar ashpër vendimin për shembjen e godinës së Teatrit Kombëtar, por edhe paketat anti-KÇK dhe anti-shpifje.
“Edhe ligjet më të thjeshta, duhet të bëhen me grupet e interesit”, ka deklaruar Braho lidhur me debatet mbi paktën anti-shpifje, e cila është kundërshtuar nga Komisioni i Venecias, organizmat ndërkombëtare, pasi cënonte lirinë e mediave në Shqipëri.
Gjithashtu, avokati Braho ka shprehur kritika të forta ndaj ndryshimeve të njanshme Kushtetuese të miratuara më 30 korrik nga Parlaenti, ndryshime, që pasuan tensionimin e situatës politike dhe ngritën pikëpyetje lidhur me procesin e ardhshëm zgjedhor.
Braho i cilësoi “grusht shteti”, ndryshimet kushtetuese të mbështetura nga mazhoranca dhe një pjesë e opozitës parlamentare.
“Do të kemi një Kod Zgjedhor të ri dhe për të pasur një Kod Zgjedhor të ri të miratuar, duhet të kalojnë disa muaj.
Kodi Zgjedhor me të cilin supozohet të bëhen zgjedhjet e vitit 2021, do jetë një Kod Zgjedhor që do hyjë në fuqi të paktën në muajin Tetor ose Nëntor.
Dhe imagjinoni nga Tetori apo Nëntori të bësh zgjedhje në Prill dhe në Maj me atë Kod Zgjedhor. Pra do të sjellë një çoroditje totale për sa i përket administrimit të votës, do të sjellë një çoroditje totale për sa i përket votuesve dhe e gjitha kjo patjetër që është në kuadrin e një grushti shteti për të pasur një rezultat në tavolinë.
Dhe këtu kur flasim për zgjedhje duhet të kemi parasysh që kjo mazhorancë sot ka të gjitha bashkitë në vend, parlamentin totalisht, ka sistemin e drejtësisë totalisht, po ashtu ka dhënë kontrata koncesionesh PPP pa fund. Po ashtu, duhet të kemi parasysh mbjelljen e Shqipërisë me drogë, kontrolle ndaj Policisë së Shtetit nëpërmjet vetingut që po bëhet.
Pra pothuajse ka kapur çdo strukturë ne vend. Dhe duke mos i dalë as këto në bazë të sondazheve siç duket, kërkon të përçajë opozitën përmes ndalimit të koalicioneve dhe të shpikë formula si këto që 1/3 është listë e mbyllur kurse 2/3 listë e hapur që nuk ekziston askund tjetër në botë”, ishte reagimi i avokatit Braho.
