Kryeministri Edi Rama ka folur sot edhe për legalizimin e kanabisit në Shqipëri. I pyetur nga gazetarët në konferencën për mediat, Rama tha se po konsultohet me ekspertizë ndërkombëtare.
Ai shtoi se ka kohë për të menduar për këtë pasi do të jetë në pushtet edhe për 4 vitet e ardhshme duke folur me bindje për sigurimin e një mandati tjetër nga zgjedhjet e 25 prillit.
“Do jetë gati kur të jetë gati dhe është e lidhur me konsultime dhe ekspertizë ndërkombëtare. Këtu jam edhe 5 vite. Do e shohim në vitin 2025-2029”, u shpreh Rama.
Ndërkohë, lidhur me hapjen e kazinove, Rama tha se nuk ka asnjë rihapje bixhozi në Shqipëri dhe asnjë lëshim dore për të dhënë leje për kazinotë.
“Është hapur një procedurë specifike për afatin e licencës. Duke pritur që cilido të ofertojë nëse ka ofertë për të bërë. Nuk është ashtu si është thënë që në këtë zonë do ketë kazino.
Ato janë vetëm kufijtë e perimetrit. Kazinotë do jenë vetëm në struktura me 5 yje. Nuk e kemi ushtruar masivisht dhe nuk do e ushtrojmë masivisht. Në hotelet me 5 yje është me ligj. Por 5 yje me brande jo si ja vë unë emrin EdiZahoLinda dhe i fus 5 yje.
Licencë për kazino marrin vetëm brandet ndërkombëtare. Jemi shumë të shqetësuar për fenomenin e përdorimit të Online siç ndodh në Kinë apo Turqi”, tha Rama.
