Mbrëmjen e sotme ora 21:00, në stadiumin “Puskás Aréna” Budapest, luhet Superkupa e Evropës ku trofeun do ta diskutojnë Sevilla dhe Bayern Munich.
Bavarezët janë fitues të “tripletës” sezonale dhe fitorja e Championsit i mundëson atyre praninë në këtë finale, nga ana tjetër Sevilla fitoi Europa League dhe siç është tradita fituesit e dy kompeticioneve europiane më të rëndësishme për klube luajnë për këtë trofe prestigjioz.
Skuadra e drejtuar nga Hansi Flick, vjen në këtë përballje si favorite duke u nisur nga forma e jashtëzakonshme që kanë treguar gjatë gjithë vitit 2020. Humbja e fundit e bavarezëve daton më 7 dhjetor 2019 kundër Borussia Monchegladbach. Që nga ajo kohë bavarezët kanë zhvilluar 31 ndeshje, 30 ndër të cilat i kanë fituar duke realizuar 106 gola, ndërsa një takim është mbyllur në barazim.
Qëllimi në Bavari është që të fitohen 6 trofe nga 6 të mundshëm, për ta bërë vitin 2020 të përsosur, duke fituar të gjithë titujt e mundshëm. Sonte fillon me Superkupën Europiane, për gjashtë ditë do të jetë Superkupa e Gjermanisë kundër Dortmund, pastaj, në letër, Botërori i Klubeve.
Nga ana tjetër, Sevilla gjithmonë është shfaqur dominuese në Europa League teksa mban edhe rekordin e fitoreve por në Superkupë gjërat ndryshojnë. Skuadra spanjolle Superkupën e parë dhe të vetme e kafituar më 2006, kundër Barcelonës. Pastaj, vetëm disfata. Që nga viti 2007, kundër Milanit, në atë ndeshje që u luajt nën kujtesën e Antonio Puerta dhe në të cilën rezultati mbeti në hije. Deri në vitin 2016, me humbjen 3-2 ndaj Real Madridit.
Në mes, gjithashtu, vlen të përmendet humbja e çmendur e vitit 2015 kundër Barcelonës, me shifrat 5-4. Për herë të parë, Sevilla do të sfidojë një kundërshtar gjerman. Ndoshta më të fortin ndonjëherë. Numrat e thonë këtë. Edhe nëse lojtarët do të jenë të barabartë në numër, në fushë.
Formacionet e mundshme:
Bayern Munich (4-2-3-1): Neuer; Pavard, Süle, Alaba, Davies; Kimmich, Goretzka; Gnabry, T. Müller, Sané; Lewandowski.
Sevilla (4-3-3): Vaclik; Jesus Navas, Koundé, Diego Carlos, Escudero; Rakitic, Fernando, Jordán; Ocampos, L. De Jong, Suso.
