Meta për Ramën: Nëse shkelet marrëveshja e 5 qershorit, do jetë fajtori i vetën

Presidenti Ilir Meta, duke iu referuar kryeministrit Edi Rama, deklaroi se nuk do të ketë fajtor tjetër përveç një personi të vetëm, nëse shkelet marrëveshja e 5 qershorit.

“Shqipëria të mos e ndajë fatin e saj me Maqedoninë e Veriut, e cila ka bërë progres, e cila zhvillon zgjedhje të lira dhe të ndershme. Për fat të keq, sjellja me ndryshimet kushtetuese antikushtetuese dhe tërësisht të njëanshme që u përpoq të godasë marrëveshjen e 5 qershorit, tregon se jemi në një kurs të kundërt me atë që pritet nga të gjithë shqiptarët dhe partnerët tanë evropianë. Çështja e hapjes së listave u përkeq palëve, për mua si Presidentit mbetet me rëndësi respektimi i 5 qershorit. Unë kam insistuar që opozita të mos vendoste si kusht qeverinë teknike për zgjedhjet e ardhshme. Edhe pse janë të gjitha provat që nga dosja e Shijakut tregon se kjo qeveri vë dorë mbi zgjedhjet në mënyrë të hapur dhe brutale. Opozita bëri lëshimin shumë të madh, me qëllim që të mbyllej kjo marrëveshje.  Gjërat janë të qarta, unë mendoj se ka mbetur edhe pak kohë për të reflektuar për ndryshe kuptohet se përgjegjësia do të jetë e vetëm një fajtori. Nuk do të ketë dy fajtorë, nëse shkelet marrëveshja e 5 qershorit, vetëm një fajtor i cili për fatin e tij personal kërkon të vërë në pikëpyetje fatin e 4 mln shqiptarëve. Kush mendoni se fati i tij është më i rëndësishëm se ardhmja evropiane e Shqipërisë e ka shumë gabim. Është në kohë për të reflektuar për të përmirësuar pozitën e vet”, tha Meta pas takimit me ambasadorët e huaj të akredituar në Tiranë.

LEXO EDHE  Kodi Zgjedhor, Varhelyi: I kënaqur që Rama mirëpret Venecian, por prisni këshillat para rivotimit

Kujtojmë se diskutimet në Këshillin Politik për ndryshime kushtetuese kanë ngrirë. Ngërçi qëndron te hapja e listave dhe koalicionet parazgjedhore. Opozita jashtëparlamentare kërkon ruajtjen e formulës së vjetër për koalicionet dhe për këtë paraprakisht kërkon marrjen e ekspertizës nga OSBE-ODIHR. Nga ana tjetër, PS ka bërë propozimet e veta dhe paralajmëron se do ti votojë me çdo kusht. Për këtë i duhen votat e opozitës në Kuvend, por përfaqësues të saj dje dhe sot në Kuvend e shfaqën hapur pakënaqësinë e tyre lidhur me propozimin e PS për hapjen e listave, që në gjykimin e tyre është një kurth për ti mbajtur të mbyllura në 90% të listës.