I dënuar me 10 vite burgim për drogë, arrestohet

Një 48-vjeçar i shpallur në kërkim pasi ndaj tij rëndonte një dënim me 10 vite burgim për veprën penale “Trafikimi i narkotikëve” kryer në bashkëpunim, është vënë në pranga në Mirditë.

Burime zyrtare nga policia bënë me dije se, Viktor Lekgegaj u arrestua në fshatin Perlat i Epër, në aksionin e koduar “Streha e fundit” kryer nga forcat “Shqiponja” dhe efektivët e komisariatit të Mirditës, mbi bazën e informacioneve të siguruara në rrugë operative.

Ai ishte shpallur në kërkim policor, pasi Gjykata e Apelit të Krimeve të Rënda, në vitin 2019, e ka dënuar me 10 vite burg, për veprën penale “Trafikimi i narkotikëve” kryer në bashkëpunim.

Viktor Lekgegaj, në vitin 2015, në bashkëpunim me 4 shtetas të tjerë, ka trafikuar lëndë narkotike kanabis në Kosovë.

“Materialet i kaluan Prokurorisë pranë Gjykatës së Shkallës së Parë Lezhë, për veprime të mëtejshme procedurale”, njoftoi policia.