Ministrja e Shëndetësisë, Ogerta Manastirliu tha se Shqipëria ende nuk është prekur nga vala e dytë, ka ecuri të epidemisë, por jo rritje eksponenciale. Ministrja u shpreh se, pavarësisht rritjeve të rasteve me Covid-19, nuk parashikohet mbyllje tërësore e vendit. Megjithatë duhet të jemi të kujdesshëm tha Manastirliu.
“Nëse sheh kurbën epidemiologjike, është e qartë se kemi një ecuri të epidemisë, e cila për fat të mirë nuk ka një rritje eksponenciale. Qeveria do të gjurmojë dhe testojë rastet për të këputur zinxhirin e infeksionet. Prandaj kemi marrë masa për të bërë testime më të shpejta dhe izolime po ashtu të shpejta. Kemi marrë masa për të përmirësuar trajtimin ambulator dhe gjithashtu qytetarët të marrin në cilësinë më të lartë pajisjet shëndetësore të nevojshme. Do të mbrojmë mjekët dhe infermierët, duke iu garantuar kushtet. Do të dyfishojmë edhe shtretërit.
Nuk parashikohet mbyllje tërësore, por do të varet nga ecuria e epidemisë, do kemi konsultime të ngushta me ekspertët, do vlerësojmë masa për t’u zbatuar jo neglizhuar. Ende nuk e kemi të matshëm impaktin e hapjes së shkollave me rastet e infeksionit. Bota është në përballjen e parë një herë në 100 vjet. Duhet të jemi shumë të kujdesshëm të kuptojmë rolin që kemi dhe në fund të ditës të shëndetit të familjarëve.”, tha Manastirliu.
Manastirliu tha se nuk do të ketë as mbyllje të Tiranës, e cila është vatra më e nxehtë në Shqipëri.
“Nuk rezultoi i suksesshëm as Lockdoëni parcial në Milano. Strategjia më efikase është gjurmimi dhe izolimi duke këputur zinxhirin. Do shtojmë gjurmimin dhe patjetër testimin. Por do shtojmë dhe ndërgjegjësimin.”, u shpreh ministrja.
