Gjykata e Durrësit ka lënë në burg pa afat Arbër Koten, shoferi i një autobusi fasonerie që qëlloi me thikë duke lënë të vdekur furnizuesin e një marketi Idajet Dulla 33-vjeç, pas sherrit për zënien e rrugës.
Masa e sigurisë për të pandehurin, djali i ish-drejtorit të burgut të Durrësit, Astrit Kote, u mor nga gjyqtari Rexhep Bekteshi, ndërsa prokuror i çështjes ishte Bledar Bregu.
Ndaj tij rëndojnë dy akuza, vrasje dhe mbajtje e armëve të ftohta.
Avokati i Kotes, Aleksandër Ndreaj, në emër të prindërve të Arbrit deklaroi se i kërkojnë falje familjes së Idajet Dullës.
Edhe i pandehuri në gjyq ka deklaruar se ndjehej fajtor dhe se ishte i penduar. Njëkohësisht i kërkonte falje familjes së viktimës.
Ngjarja e rëndë që tronditi Durrësin u regjistrua pasditen e të shtunës (19 shtator).
Idajet Dulla është gjetur i vrarë pasi ishte qëlluar me thikë në zemër nga Arbër Kote, djali i ish-drejtorit të burgut të Durrësit, Astrit Kote. Ai punonte si shofer i një urbani që transportonte punonjës të një fasonerie në zonë.
Viktima Idajet Dulla, ka qenë duke drejtuar një furgon malli me të cilin i ka zënë rrugën autobusit të Arbër Kotit që transportonte punëtorët e fasonerisë.
Për këtë shkak, mes drejtuesve të dy mjeteve ka nisur një konflikt që përfundoi me përdorimin e thikës. 34-vjeçari Idajet Dulla është dërguar në spitalin e Durrësit, por nuk ka mbijetuar nga plaga vdekjeprurëse në zemër.
