Partia Socialiste do të mbledhë sot grupin parlamentar, mbledhje e cila do të diskutojë jo vet1%m mbi veprimtarinë parlamentare, por edhe atë organizative të partisë qeverisëse.
Përveç faktit se socialistët janë shprehur se do të miratojnë ndryshimet në Kodin Zgjedhor, duke implementuar ato Kushtetuese, që kanë të bëjnë me listat dhe hapura dhe koalicionet parazgjedhore, brenda 30 shtatorit, çështjet që do të diskutohen kanë të bëjnë me organizimin e mbledhjes së Asamblesë Kombëtare, por edhe raportimi për qarqet.
Asambleja e Partisë Socialiste do të mbahet në javën e parë të tetorit. Ajo do organizohet në 3 rajone, një në Shkodër, Fier dhe Tiranë për të bërë të mundur respektimin e masave anticovid dhe do të lidhen me njëra tjetrën on line, ku do të njoftohen dhe vendimet.
Mbledhja e Grupit Parlamentar, sipas disa raportimeve, do të zhvillohet pa praninë e Kryeministrit Edi Rama, ndërsa këtij të fundit pritet t’i paraqiten raportet sipas qarqeve nga Taulant Balla, Sekretar i Përgjithshëm i PS-së dhe njëherazi kreu i deputetëve socialistë.
Lidhur me reformën zgjedhore, PS ka paraqitur një draft mbi listat e kandidatëve, që është kundërshtuar edhe nga opozita parlamentare, dhe ajo e bashkuar. Kjo për faktin se ndryshe nga premtimi për hapjen e listave 100%, me propozimin e tyre, socialistët i japim të drejtën kryetarëve të partive, të përzgjedhin emra për deputetë nga lista e kandidatëve.
