Elton Meta nga fshati Peshtan prej orës 22:00 të mbrëmjes së të shtunës vijon që të kërcënojë me vetëvrasje me kallashnikov në oborrin e banesës së prindërve të gruas së tij në Zhupan të Fierit.
Drejt Fierit, në fshatin Zhupan, është nisur njësia RENEA që ka dhe negociator, me qëllim për të bindur të riun që të heqë dorë nga akti i rrezikshëm që ka ndërmarrë.
Raportohet se i riu, 31-vjeç, ndodhet në gjendje të rënduar dhe dyshohet se ka konsumuar një sasi të lartë alkooli. Nga të dhënat e para mësohet se 31-vjeçari ka shkuar në banesën e prindërve të bashkëshortes së tij, i armatosur, çka u mendua se i kishte marrë peng. Shkak për situatën e krijuar dyshohet se është xhelozia e 31-vjeçarit.
Banesa e vjehrrit të 31 vjeçarit është 3 katëshe dhe të paktën ishin 8 persona në banesë.
Drejtoria e Policisë së Fierit deklaron se familjarët që ndodheshin në banesën 3-katëshe në oborrin e së cilës dhëndri Elton Meta po kërcënon me vetëvrasje, janë evakuuar.
“Nuk ka persona të lënduar dhe as të marrë peng. Familjarët janë evakuuar nga banesa nga forcat policore” thotë policia.
Ndërkohë që aktualisht, policia thekson se po negociohet me 31-vjeçarin që të heqë dorë nga kërcënimi për vetëvrasje dhe të vetëdorëzohet pa pasoja.
Ai vijon që të jetë prej orës 22:30 në oborrin e banesës së vjehrrit të tij me një armë automatikë dhe kërcënon se do vrasë veten.
