Ministri i Punëve të Jashtme të Turqisë, Mevlüt Çavuşoğlu, tha se Turqia thirri sonte të dërguarin e Greqisë në vend për një titull të neveritshëm në një gazetë greke rreth presidentit turk, raporton Anadolu Agency (AA).
Fyerja dhe mallkimi nuk duhet të shihen në drejtim të lirisë së shtypit, tha Çavuşoğlu në një konferencë për media.
Ai theksoi gjithashtu se nuk ka kuptim të ndërmarrësh nisma të reja në Qipro të cilat janë të dënuara të dështojnë.
“Ne kemi thënë vazhdimisht se nuk do të negociojmë më për një federatë mbi çështjen e Qipros”, tha ai.
Në vitin 1974, pas një grushti shteti që synonte aneksimin e Qipros në Greqi, Ankarasë iu desh të ndërhynte si një fuqi garantuese. Në vitin 1983 u themelua Republika Turke e Qipros Veriore (TRNC).
Dekada kanë kaluar duke regjistruar disa përpjekje për të zgjidhur mosmarrëveshjen e Qipros, por të gjitha përfunduan me dështim. E fundit, e zhvilluar me pjesëmarrjen e vendeve garantuese, Turqisë, Greqisë dhe Britanisë së Madhe, përfundoi në vitin 2017 në Zvicër.
Në vitin 2004, në dy referendume, plani i Sekretarit të Përgjithshëm të atëhershëm të OKB-së, Kofi Annan, u pranua nga Qiproja Turke, por u refuzua nga Qiproja Greke.
Në një raport të fundit, Sekretari i Përgjithshëm aktual i OKB-së, Antonio Guterres, poashtu tha se “ide të reja” ndoshta janë të nevojshme për një zgjidhje në ishull.
Së fundmi, Greqia ka kontestuar kërkimin e Turqisë për energji në Mesdheun Lindor, duke u përpjekur të bllokojë territorin detar turk të bazuar në ishuj të vegjël pranë bregdetit turk.
Turqia, vend me vijën më të gjatë bregdetare në Mesdhe, ka dërguar anije të shpimit për të eksploruar energji në ndarjen e saj kontinentale, duke deklaruar se Turqia dhe Republika Turke e Qipros Veriore (TRNC) kanë të drejta në rajon.
Zyrtarët turq thonë se dialogu për ndarjen e këtyre burimeve në mënyrë të drejtë do të ishte një fitore për të gjitha palët.
